【實習同學講啲乜】長女症候群
實習同學講啲乜
中文大學 文化研究系 Candy
講起「家庭分工」，大家都會諗起「男主外、女主內」，媽媽通常比爸爸要承擔更多照顧小朋友、做家務嘅責任。但係原來，仲有一班「長女」，似乎亦默默咁承受咗家中父母未能履行嘅責任，可能係被要求湊細佬妹，亦可能係因為父母冇時間、唔願意做家務，而要承擔埋屋企剩低嘅家務。
近日，喺美國、台灣、韓國等興起「長女症候群」(eldest daughter syndrome)嘅討論，指出社會中觀察到「長女」通常都有一啲相似嘅特質，當中呢啲共通點似乎受到 #性別定型 同埋 #重男輕女 嘅觀念影響。
喺華人社會入面，上世紀好多長女細細個已經要幫屋企分擔家務、睇住細佬妹，去到一定年紀可能更要放棄學業，儘早踏入職場幫補家計，供養其他仔女繼續升學讀書。台灣呢本《長女病》（張慧慈著 ）就紀錄咗作者身邊認識嘅「長女」嘅故事。例如55歲嘅阿雀，讀完初中就因為父母想起屋而叫佢幫手出嚟賺錢，就算學校老師主動提出想負擔阿雀學費支持佢升學，但因為阿媽反對而放棄。阿雀出嚟做嘢都表現出色，甚至為公司發展出一套更有效率嘅分工模式，不過因為欠缺學歷，即使上司賞識佢都冇辦法晉升。而屋企即使有阿雀嘅犧牲，幫助細佬成為學歷最高既家庭成員，但後來又因為被裁員而一蹶不振，沉迷online game，令阿雀意識到呢種自我犧牲並冇實際嘅意義。
去到21世紀，似乎社會已經逐漸淘汰以往守舊嘅家庭觀念，「長女」仲需唔需要犧牲自己或者承受屋企壓力呢？《長女病》就提到，現代不婚主義嘅女性亦會畀父母勸「唔打算結婚嘅話，就多啲幫手照顧下大哥／細佬嘅小朋友啦」，甚至發展成一個群體「潘克族」（Panks），指一班受過良好教育、收入高嘅職業女性，因為愛錫兄弟姐妹嘅小朋友，而付出金錢同時間。就好似書入面另一位「長女」佳佳嘅故事，佢大學畢業就結婚，並有共識唔生育。之後因為家中細佬離婚留低一子一女，父母二人都唔想照顧，於是身為家姐嘅佳佳接手照顧個女一段時間後，決定正式領養呢個女，但其後復婚嘅細佬兩夫妻就極力反對，而父母亦勸佢：「做家姐嘅幫細佬湊細路都好應該，一家人唔好計較咁多啦。」佳佳回想起一直以嚟細佬做錯嘢，屋企都會包庇佢、幫佢執手尾，做家姐嘅就唔可以同佢計較，似乎要家姐承擔更大嘅責任。
其實「長女」亦係好多影視作品嘅典型角色，最近一套頗有討論度嘅韓劇《苦盡柑來遇見你》，被唔少台灣作者拎出嚟同「長女病」嘅現象一齊分析，劇中三代長女，第一代長女光禮係濟州島上嘅其中一名「海女」（해녀），即係以自由潛水方式捕撈漁獲嘅工作，係一份回報高但高危嘅職業。身為長女，光禮當年冇辦法選擇自己嘅命運，但佢出盡全力保護自己嘅女兒愛純，唔想佢為咗細佬妹而犧牲自己既學業。愛純長大後，成為三個小朋友嘅媽媽，喺重男輕女嘅小漁村之中，家族計畫要培育愛純仍然年幼嘅長女金明去做「海女」，幫補家庭收入，愛純為咗保護金明，極力反抗家族，希望金明作為長女，依然可以活出屬於自己嘅人生。
另外，動漫《鬼滅之刃》入面嘅竈門禰豆子（二姐)，雖然有長子炭治郎承擔家計，但亦可見佢係僅次母親同長子負責照顧細佬妹嘅家姐角色。人類時期嘅佢形象一直都係孭住弟弟或妹妹，留喺屋企目送炭治郎到小鎮賣炭；動畫《Frozen》嘅Elsa喺故事初頭為咗繼承王位同避免傷害妹妹，長女角色嘅約束加上父母嘅要求一直令佢壓抑自己冰雪魔法嘅能力，冇辦法真實做自己；《龍貓》嘅家姐草子因為母親生病住院，代理母職打理家中大部分家務，甚至喺4歲嘅妹妹走失時四處奔波，非常重視家人。「史迪仔」裡面Lilo嘅家姐Nani，父母車禍意外身亡後兩姊妹相依為命，即使孤兒院想接手照顧妹妹，但只有18歲嘅Lilo唔想同妹妹分開，獨力肩負家計同照顧嘅責任。
💬💬大家又點睇「長女症候群」呢個現象呢？仲有冇諗到其他「長女」角色？💬💬
參考資料
《長女病：我們不是天生愛扛責任，台灣跨世代女兒的故事》張慧慈
Youtube：bit.ly/3HWx7Uo (志祺七七)
Youtube：bit.ly/45Wm3yq (Katimorton)
– – – – –
圖片來源
Disney Animation “Frozen”
Disney Animation “Lilo & Stitch”
スタジオジブリ ｜STUDIO GHIBLI
テレビアニメ「鬼滅の刃」竈門炭治郎 立志編
劇場版「鬼滅の刃」無限城編
📚Anti480反性暴力資源中心
為青少年／家長／專業人士提供性暴力及性別平等相關的教育活動，讓參加者認識性別及性暴力等議題。
歡迎預約教育活動、團體參觀或查詢更多教學資源：
🔗 anti480.org.hk
更多親子性教育教育資源：
🔗 anti480.org.hk/parent