【實習同學講啲乜】女性喺F1行業嘅參與

實習同學講啲乜
社區影子實習計劃 阿維

---

最近有一套關於賽車的電影上映，當中談及女性在F1賽車行業的劇情，令人印象深刻。

《F1: The Movie》中，由Kerry Condon飾演嘅Kate McKenna，戲中作為車隊技術總監，肩負帶領團隊研發賽車、制定策略嘅重大責任之外，仲需要喺充滿競爭同壓力嘅環境中，突破性別偏見。Kate喺電影中遇到嘅事，正正就係現實世界入面，好多女性喺科技、工程、體育等傳統男性主導行業中真實存在嘅現象。

👉 咁而家究竟有冇女性喺F1擔任技術總監呢？

好遺憾，直到現時為止，都未有女性喺F1擔任技術總監。不過，近年開始有越嚟越多女性投身到F1行業當中，例如美國Haas車隊嘅Laura Mueller喺2025年成為F1首位女性賽事工程師，負責與車手直接溝通同調整賽車表現，喺賽車團隊中屬於非常關鍵嘅技術角色；另外，Red Bull工程組嘅首席策略工程師Hannah Schmitz專責比賽戰術、數據分析同策略模擬，佢曾經大膽地調節比賽嘅風格，亦都係Red Bull多次成功奪冠嘅重要幕後功臣。

👉 其實有冇女車手㗎？

歷史上，有5名女性車手，例如意大利車手Lella Lombardi，佢喺1974至1976年間有17次參賽紀錄，係參加過最多F1世界錦標賽分站賽事嘅女性車手；南非車手Desiré Wilson則曾係1980年Aurora AFX Formula One系列Brands Hatch站中獲得勝利，成為首位喺同類賽事攞到單站冠軍嘅女車手。由此可見，只要有足夠發揮機會，將來肯定會有更多女性車手嘅努力俾大家見到。

其實近年F1都有嘗試推動性別平等同鼓勵女性投身到呢個行業當中，例如喺2023年成立嘅 F1 Academy—一項開放比16至25歲女性參加嘅方程式錦標賽，希望可以鼓勵年輕女性車手，培育佢哋參加更高級別嘅比賽。有興趣嘅朋友仔都可以去睇吓《F1 Academy：全女子賽車學院》呢套影集去了解多啲 F1 Academy。

隨住F1推動性別平等嘅努力，女性喺F1賽事領域嘅影響力亦都逐步提升，呢個現象唔單止可以激勵更多女性投身賽車運動同相關行業，亦都為其他由男性主導嘅行業帶嚟啓發。期望未來其他由男性主導嘅行業，都能夠借鑒F1推動性別平等嘅經驗，加強對女性人才嘅支持同培育，建立更公平嘅工作環境，令更多女性可以喺各行各業發揮所長。

－－圖片來源－－

Pauline Ballet/Formula 1 / Getty Images

Netflix F1: The Academy 宣傳圖片

---

📚 #Anti480反性暴力資源中心
為青少年／家長／專業人士提供性暴力及性別平等相關的教育活動，讓參加者認識性別及性暴力等議題。

歡迎預約教育活動、團體參觀或查詢更多教學資源：