Yahoo｜職場性暴力激增 性侵「幸」存者訴受辱經歷 設計「退散符」：性騷擾唔係一件小事

一個生日蛋糕，象徵 J 遭受性暴力的恥辱，亦感染有相同遭遇的 Coco 同行。兩人分別在職場和校園遭遇長時間性騷擾，投訴過程卻換來機構及學校的二次傷害，J 更被要求為加害人買生日蛋糕修補關係。J 在性侵「幸」存者展覽分享經歷後，令 Coco 決心參與敘事治療，直面傷痛。風雨蘭近年接獲的職場性暴力個案激增七至八成，她們更成為該組織「SH.E 性騷擾倡議小組」一員，出版「性騷擾應對指南」及推出「退散符」等小物，教育僱主和大眾應對事件的方法，「我想大家明白，好多人覺得呢件唔係一件小事，我哋更加需要做啲嘢為更多人發聲」。

6 年前，阿 J 加入一間社福機構做行政工作，被一名男同事接連騷擾，包括言語、眼神及身體接觸，持續超過一個月，「每一個行為都令我好難受、好唔舒服」。J 決定向機構負責人投訴，豈料對方為她帶來的，只有二次傷害。

僱主收投訴 仍安排單獨與加害人開夜班

J 的上司指會成立獨立調查委員會徹查，「點知佢真係好『獨立』，係一個人『獨立』地去調查」。J 要求查看機構的防止性騷擾指引，「但佢交極都交唔到出嚟」。上司亦完全沒有跟她交代調查進度，「我完全無 concept（概念）究竟佢係唔係跟住程序，如果你真係跟指引去做，首先你唔會得一個人做」。

其上司亦替涉事男同事開脫，聲稱他不清楚與女生相處、接觸的界線，「我覺得好難相信，佢自己應該知道，你無得人同意去摸人一下，其實一個正常人都會覺得係唔舒服嘅事」。J 投訴後仍需與涉事男同事單獨上夜班，「我哋依然要喺一個好細嘅空間繼續做嘢，最起碼你唔好安排我同佢夜晚一齊返，我都有表達過，但機構係無做到任何嘢」。

被要求為加害人買生日蛋糕：係侮辱嘅行為

J 有天突被上司召見，一進房就看到涉事男同事，「叫我坐低，然後聽佢（加害者）講咗一輪所謂嘅道歉，其實我無任何心理準備去接受呢件事。理想啲嘅係應該先同我講，幾時幾刻會做呢件事」。J 當時唯有強調希望機構認真對待事件，「我有直接講『我唔希望仲有下一個受害人』，但機構最後係話『你講返自己得㗎喇』」。

為緩和同事之間氣氛，機構更著 J 為涉事男同事選購一個生日蛋糕慶祝，「我覺得好嬲，間接上都係一個侮辱嘅行為」，事後該名男同事的騷擾行為並沒有停止。

友人質疑感受：「可能人哋唔係望住你」

J 指，今次遭遇令她失去對人的信任，「投訴係基於我對機構負責人嘅信任先去做，但換返嚟嘅係佢偏幫加害人嘅時候，你發現原來身邊最信任嘅人，到最後都係其中一個加害人」。公司以外，她曾向朋友訴說感受，不少朋友的回應令她傷害更深，「你會唔會好敏感，可能人哋唔係望住你，係你覺得人哋望住你」。被質疑的感覺並不好受，「我寧願你唔講任何嘢，你唔好批評我，呢個係令我更加無力嘅一個位」。

最終，J 參與風雨蘭的敘事治療小組，好好抒發和治癒。2021 年，她參與「480.0 性別 x 藝術空間」的「性侵幸存者一物」展覽，展出一個黑白色的生日蛋糕。蛋糕盒子帶有一層迷濛，象徵她看不清的人性，亦反映公義路上前景未明。J 在展覽中寫下對同路人的寄語：

「你會傷心憤怒，不要緊，這不是你的錯，擁抱它，也要抱抱你自己，你有被愛被擁抱的價值，有日你會發現原來自己也可以很價值，不要質疑自己所有的決定，這是你的故事，你的人生，不需要向那指三道四的人負責任，回嗆他們一句：『關你叉事！』」

J 那時不知道，這段話正是 Coco 的救贖。

校方未經同意聯絡加害人

「J 小姐嘅作品講嗰種赤裸裸嘅憤怒，我發現我嘅憤怒原來係可以被 validate（證實），原來我仲有資格嬲」。

Coco 遭遇的是大學校園性騷擾。一名男同學 4 年間不斷以帶有性意味的言語、動作騷擾她及其他女同學，令她恐懼上學，「好擔心要同佢一齊上堂，擔心我 present（簡報）佢又會畀 comment（意見），呢啲互動我都唔想有」。最後一個學年，Coco 約見學校輔導員談及事件，輔導員著她找學系老師投訴。她向一位可信、有性別意識的老師求助，惟對方又著她到學生事務處，「成件事我係要不斷同好多人講一次，我發生乜嘢事」。

學生事務處為 Coco 立投訴個案，她列明事件細節後，學校表示會再向她報告，「但差唔多相隔咗 6 個月都無人理我」，遂電郵查詢進度。怎料校方將該電郵轉發至涉事男同學，「同我哋一開始 agree（同意）嘅唔同，一開始話如果真係會同個 abuser（加害人）聯絡，你要同我講，我個名都唔係咁樣公開」。

老師嫌麻煩：「你仲想點呢？」

該男同學應校方要求撰寫道歉信，但由於投訴事件變相「被公開」，Coco 與同儕關係開始疏遠，「好似變咗一個 outcast（被遺棄者），會覺得你唔玩得或者小器」。事後她仍要與該男同學一同上課，甚至要到海外交流，「其實好多位都可以細心啲去處理，如果 department（部門）可以預先話我知嗰個同學 reg（修讀）咗咩科，起碼我可以揀讀唔讀」。

Coco 曾向老師提出此等意願，對方卻反問：「你仲想點呢？」她原定是畢業生致辭代表，惟突然被通知已換人，「好明顯老師對於我想繼續跟進係覺得唔理解同憤怒，即係覺得我搞到佢好麻煩，要處理呢啲嘢」。

「別人說的件件小事，我們不能草草了事」

J 和 Coco經歷過風雨後， 成為風雨蘭「SH.E 性騷擾倡議小組」一員，與更多受害人同行。J 指，「SH.E」命名來自「Sexual Harassment（性騷擾）」，「E」則有兩個含意：是「Ending（完結）」也是「Empowerment（充權）」，「我哋唔能夠避免性騷擾出現，但至少希望大家識得點樣處理呢件事，將二次傷害減到最少，對受害人嘅同行係更加多」。

小組曾檢視不同企業有否設立性騷擾指引，又設計紙巾派予大眾，上面印有性騷擾的求助熱線，「受害人通常好多眼淚，點樣智慧地令到人求助都好緊要，設計都係圍繞受害人感受去做」。近月，小組出版「性騷擾應對指南」，印上口號：「別人說的件件小事，我們不能草草了事」，並列明僱主／管理層對性騷擾的法律責任和應對方式。

J指坊間對性騷擾的態度大多是「其實好小事啫，做乜要投訴？」輕視其嚴重性，「大家對性騷擾嘅感覺就係，對比起強姦，你都無少到忽肉，但嗰種傷害係以年計。我到今日見到報紙上講性騷擾嘅事、好明顯係性騷擾嘅留言，都會好觸動到自己。你話會唔會100% 療癒？其實係唔會」。

職場性騷擾事件激增八成

根據《性別歧視條例》，性騷擾是指含有性意味並且不受歡迎的行為。J 和 Coco 的事件，或許只是冰山一角。風雨蘭在近 5 年個案中，針對職場性暴力事件，侵犯者與受害人之間是「工作關係」（例如上司、同事、下屬）的個案，由 196 宗（2014-2018）升至 340 宗（2019-2023），升幅約為 70% ；發生在「辦公地方」的個案，亦由 120 宗（2014-2018）升至 214 宗（2019-2023），升幅約為 80% 。當中有約 45% 為非接觸形式的性騷擾行為。

「其實你可以 to be not okay」

對於目前受性騷擾陰霾籠罩的人，J 希望受害人可以直面自身感受，「佢哋都好努力搵緊出口，但唔好迫自己一定要講『我好好』，其實你可以 to be not okay（感到不好）」。她指，受害人只要一伸手，她們定必同行，「只要你去搵，仍然有一班人同你一齊行，我哋每一個人都係咁樣，其實無人係一個人去行」。