「大象轉身」性暴力倖存者倡議小組

一群性暴力倖存者深知現行制度未能回應創傷，遂組成倡議小組，名為「大象轉身」，寓意逐步開始巨大的改變。
他們自稱「小象」，走在一起籌劃活動，以自身經歷推動社會視角與法律體制的轉變。
「大象轉身」性暴力倖存者倡議小組於2026年1月25日、2月7至8日籌備「倖存者帶路：性罪行法例改革之必要」，活動之後，倖存者寫下感想。

2025年4月和8月兩次性罪行法改共學後，倖存者們走在一起，開啟「大象轉身」行動，當時的心情為何？

仲記得當時懷住一份單純嘅好奇心去參與。第一次 join 嘅時候，聽到協會倡議同事解釋現行法例有幾荒謬，我其實真係好憤怒，心入面有種唔甘心嘅感覺，覺得自己一定要做啲嘢，唔可以就咁算數。

籌備「倖存者帶路：性罪行法例改革之必要」活動的感想

今次係我第一次做 facilitator。平時參加 panel discussion 參加得多，對呢個角色其實一直都有一個既定印象，要好識控場、應變能力強、保持冷靜，同時思路清晰。所以最初聽到要做 facilitator 嘅時候，我第一個反應係覺得自己未必勝任。

直到組員 Dorothy 提議一齊做，我先覺得有個照應、有個拍檔，其實可以試吓。有人同行，份壓力好似無咁大。

第一次同嘉賓預習嘅時候，我基本上都係保持住好奇寶寶嘅心態，問一啲自己真係想知道答案嘅問題。嘉賓真係好好，好有耐性，有問必答。就算我嘅問題聽落有啲基本，甚至好似問到好細微嘅位，佢哋都無怪責，反而會盡量配合我嘅程度去解釋，令我明白到——喺尋求知識嘅過程入面，其實無所謂蠢問題，只要你係真心想學，從中有得着，就已經足夠。

去到活動當日，我真係好緊張，好驚自己會出醜。但身邊嘅小象一直畀我好多支持同鼓勵，令我慢慢覺得自己其實可以做到。雖然我覺得自己嘅表現仲有進步空間，但能夠同其他小象一齊為呢個活動付出、貢獻一分力，我已經覺得好 proud。

三日活動中特別深刻的片段

三日以來最深刻嘅係見到參加者好專心咁聽分享者講嘅嘢，尤其係聽倖存者分享，見到部分參加者好觸動，我感覺嗰刻好似多咗好多同行者。

「大象轉身」對我的意義

「大象轉身」畀咗我一個機會將情緒轉化成行動，將無力感變成參與感。佢令我知道，就算制度好似一隻龐然大物，轉身好慢，但只要有人願意一齊推，改變唔係完全無可能。

另外，呢個行動對我嚟講亦係一個成長嘅過程。由最初覺得自己唔夠好、唔夠資格，到慢慢願意企出嚟發問、嘗試做 facilitator、為活動出一分力，我發現自己其實比想像中更有能力。呢個過程令我學識，參與唔一定要完美，重要嘅係願意承擔同學習。

「大象轉身」成員 Natalie 的故事