被撕破的熊仔

侵犯Ｒ小姐的，是她的親生父親。

「我擔心人哋唔會信，可能覺得同住家姐都冇事，唔會信自己有事。又怕講左出黎會唔會俾人掉出街、會俾呀媽鬧、話我講大話。」

Ｒ小姐擔心一旦吿發侵犯者，就會成為家庭的破壞者，「頭家就散」，全家都會不喜歡她。

「最擔心嘅，係唔知道侵犯者會唔會更加傷害我…..」

隨著侵犯者的行爲越來越過份，Ｒ小姐鼓起勇氣把事情告訴學校的一位教學助理。他聽到後答應會保密，亦陪伴著Miss R哭，令她感到原來有人相信自己。教學助理為她想方法解決，亦教她如何避開侵犯者；可憎隨後數月，Ｒ小姐發現情況並沒有改善，便決定在教學助理陪同下向學校社工求助。

「社工再同呀媽講；但呀媽情緒反應好大，返到屋企係咁質問我，又叫我同侵犯者當面對質講清楚；我仲好記得佢好多粗口係咁鬧我；我忍受唔到所以當晚去左宿舍暫住。雖然侵犯者之後搬走咗，我返返屋企住，但呀媽對我嘅傷害我無法忘記。」

親人的不信任與怪責，讓Ｒ小姐覺得二度傷害比起本身的性侵事件為她帶來了更大的傷害。

「我雖然都有諗過呀媽會鬧我，但我心入面係希望社工同咗佢講後，佢會喊住同我講「對唔住，一直唔發覺，保護唔到你」之類。可惜現實係佢嘅鬧比我相像中反應更大更傷。呀媽話我『勾引人、連自己親人都搞』。」

經歷了輔導過程，加上讀書令Ｒ小姐對gender perspective（性別角度）有了更深入的了解，羞恥的感覺已縮小了一半。#metoo movement 亦讓她感到有很多同路人，而不是自己一個。被撕破的熊仔過往的意義是撕破、棉花散落一地、沒人理會。如今Ｒ小姐看到的不再是這畫面。

「熊仔雖然有破碎的棉花，但仍是完整的一隻公仔。破碎的棉花已逐點被換走，換上新的棉花。代表著我對自己經歷的接納、他人的愛與關心。」