【懶人包】性騷擾事件並非件件小事
🗣️「人哋都係講吓笑啫，俾啲幽默感啦」
👩🏻🏫 #你無所謂唔代表我都無所謂
錯錯錯！只要係有 #性意味 ＋ #不受歡迎 嘅言論都可能係性騷擾！無論騷擾者係有心定無意、惡意定講笑，如果當事人感到不安、被冒犯、被侮辱、受威嚇或不被尊重，都可能構成性騷擾。
🗣️「好小事啫，唔使咁敏感」
👩🏻🏫 #你口中嘅小事係人哋心中嘅大事
性騷擾行為包括令人唔舒服嘅身體接觸、令人難堪嘅言語騷擾、有性意味又令人討厭嘅肢體動作等等。性騷擾行為其實並無「嚴重程度」之分，就算無身體接觸，都可能對當事人構成好大嘅傷害。
🗣️「咪已經停咗佢職囉，你仲想公司點」
👩🏻🏫 #仲可以做得更好！
好多公司喺收到投訴後，都傾向用官腔嘅態度回應當事人，甚至會冷處理，想㩒低件事。其實喺接收到投訴嘅一刻，亦同時係收到求助，喺處理投訴期間，謹記要對投訴人保持同理心，唔好當佢係一個「troublemaker」、草草了事。記住，公司係有責任要保障職員免受性騷擾，亦要為僱員嘅性騷擾行為負上「轉承責任」。
性騷擾事件並非件件小事，更不能草草了事 － 不以為然嘅態度、淡化性騷擾嘅行為同藉口不但助長工作間嘅敵意環境，更加令到同事不能於工作間感到安全，削弱其公平地發揮潛能之機會。
祝願大家唔會遇到性騷擾，但萬一你有相關嘅經歷，都想同你講聲，你唔係孤單一個，我哋支持你。