【懶人包】任何淫之網絡觀察日誌

大家平時見到有性暴力事件嘅時候，通常會點樣回應呢？

有啲說話，明明係想幫助倖存者，但反而造成二次傷害？

今日就由我 #任何淫 同大家拆解網絡上各種常見嘅 #性暴力迷思 啦！

－－－－－

常見回應1️⃣：「汲取教訓，學識保護自己」

➡️怪責受害人（Victim Blaming）

睇落似係為受害人好，希望受害人將事件視為係自己唔小心嘅「教訓」，但其實係將事件發生嘅責任歸咎喺受害人身上。事實上，性暴力會發生係出於侵犯者違反、忽視、罔顧對方意願，而唔係受害人無保護自己，侵犯者先係需要被檢討嘅對象！將 #性同意 概念推廣俾更多人知道，先可以阻止性暴力事件再次發生！

常見回應2️⃣：「點解唔反抗」

➡️4F求生策略

有啲人會覺得，唔想咪即時推開或者離開囉，點解仲「傻更更咁」留喺現場？當性暴力事件發生，受害人或可能處於驚慌、恐懼、詫異嘅情緒，導致身體僵住，冇辦法即時反應／反抗。呢種係好普遍嘅生理反應嚟，根據美國資深心理治療師Pete Walker提出嘅「4F」求生策略，包括戰（Fight）、逃（Flight）、僵（Freeze）同討好（Fawn），「戰」同「逃」經常被大家討論，但似乎就忽略咗人可能會產生「僵」或者「討好」嘅防衛機制，亦即係反抗唔到、或部份妥協以減少傷害等求生策略。

常見回應3️⃣：點解唔報警／搵傳媒

任何淫想提醒大家喺性暴力事件發生嘅時候，應該以倖存者嘅感受為先，如果無心理準備就迫倖存者公開事件或者報警，可能會有更差嘅結果。而且，舉報流程比大家想像中更複雜、困難，大多數倖存者都要經歷漫長且痛苦嘅司法程序，假如過程中有專業人士（如社工、醫護人員、警察等）對受害人帶有唔同程度嘅偏見、誤解，有機會令倖存者遭受二次傷害。而成功定罪嘅性暴力個案亦唔多，根據《風雨蘭個案回溯研究報告 2000-2018》，1,818宗報警個案中，有350宗獲律政司起訴，當中只有221宗（個案的八分之一）喺第一次判決後定罪。

－－－－－

作為旁觀者嘅我哋可以做啲咩？

雖然有好多人願意支援倖存者，但討論區之中質疑、指責受害人嘅聲音亦會繼續存在，甚至出現更多，點算好呢？任何淫想提議大家一齊試下改善討論區嘅風氣，因為任由負面聲音繼續發酵，受害人好難單靠自己去面對，如果有大家幫手回應網民嘅質疑同批評，咁當受害人睇到呢啲回應，所受到嘅傷害亦可能會大大減低。重點唔係要同網民爭論，而係陪伴受害人應對負面聲音。

如果你想更代入性暴力受害人嘅視角，任何淫推薦Anti480嘅互動式嘅體驗活動「網絡審死官」，喺呢個活動入面，參加者會學習到點樣用更好嘅回應方式陪伴受害人。

---

📚Anti480反性暴力資源中心

為青少年／家長／專業人士提供性暴力及性別平等相關的教育活動，讓參加者認識性別及性暴力等議題。