【性/別新聞台】日本鐵路防偷拍策略
最近有人發現日本靜岡縣鐵路站出現神秘鏡子，原來呢個係靜岡縣警察局嘅一個實驗：將扶手電梯平時擺放廣告嘅位置，換上一塊「廣角鏡」，結果竟然大幅減少偷拍案！
呢個做法，最初由埼玉縣喺2023至2024年間推行。靜岡縣警察有見2023至2024年期間，縣內連續兩年有過百宗鐵路偷拍案件😱，決定自2025年6月起仿效埼玉縣，喺扶手電梯旁加裝廣角鏡🪞。
結果靜岡縣2025年6月至12月嘅扶手梯偷拍案件，由上一年同期嘅25宗大減至兩宗。專家指，廣角鏡令人不自覺地觀察到身後嘅人，👁對想偷拍嘅人造成威嚇作用👁，令佢哋唔敢係電梯位置偷拍，直接減少偷拍情況。
得益於以上兩縣嘅成果，現時愛知縣、大阪府等地都開始計劃實施類似嘅做法。👏👏
反觀香港亦時有電梯偷拍事件，咁你又覺得我哋可以點樣阻嚇偷拍行為呢？留言話我哋知啦～