他送給我的髮帶
幸存者：Teea（化名）
「呢個係我個ex送俾我嘅18歲生日禮物，而嗰段關係算係一個刻劃我面對性暴力事件嘅轉捩點。」
「過往，這髮帶的意義係甜蜜嘅支持；而家，佢係一個可怕陰影，或者都係一份對人嘅失望。」
與前度剛開始發展關係時，Teea正開始接受輔導，面對被親生哥哥性騷擾嘅過去。當時的她個人思緒極度混亂，並害怕去面對一切。
「嗰份生日禮物本來係個ex想同我講，佢會陪我一齊渡過難關嘅一份陪伴。然而，佢最後亦係一名施暴者。禮物中嗰份『陪伴』嘅意義都成為咗另一份傷害。雖然標記咗一份對親密關係嘅恐懼。但係，亦都係一份提醒，提醒呢個已經係過去，而自己亦要重新振作，成為一個走出陰霾嘅人。」
幸而，Teea 找到了能一直聆聽、陪伴她去渡過最困難時候的朋友。
「佢喺我未意識到呢個係性暴力嘅時候，肯定我嘅經歷。提醒我要馬上離開呢個人。亦一直聆聽、陪伴我去渡過最困難既時候。」
「不過，我經常都質疑會以上事件係咪真實發生過，直到遇上風雨蘭輔導員，一直肯定我嘅感受、經歷，亦令我慢慢消化、接受發生過嘅一切。風雨蘭亦係一個空間，去講一啲平時難以啟齒嘅傷痛。有人喺黑夜中同行，係一支強心針去俾我去面對心入面難以承擔嘅傷痛。」
即使是在情侶或婚姻關係中，任何在欠缺另一方性同意下作出（或企圖作出）的具性意味行為均屬性暴力。
不帶質疑和批判地聆聽，才能助幸存者一步步邁向曙光。
Teea有話對與她有相同經歷的人說
性暴力發生之後，好多時未必可以清晰咁確定件事係性暴力。侵犯者有可能對於自己嘅行為好多藉口、解釋，身邊嘅人或者會質疑你嘅經歷，自己可能都會懷疑自己嘅記憶、感受，甚至有自責嘅感受。但係，你無做錯，錯嘅只係侵犯者。相信自己嘅感受。同埋，人地嘅錯無法定奪你嘅價值，你值得被尊重。被降低價值嘅只係侵犯者。最後，一定要相信，你絕對有能力走出性暴力嘅陰霾。我地要一齊加油，共勉之。