近日一宗冒認女同性戀者性侵案件當事人之回應
就近日引起關注的一宗冒認女同性戀者性侵案件，當事人X小姐了解外界對案件的關心，故希望透過風雨蘭表達以下感受：
事發過後，我不免反問自己，點解佢要咁做。喺唔同嘅女同性戀平台一而再，再而三咁見到佢，扮TB，約女同性戀者出嚟發生性行為，故意叫我負責book酒店，佢就盡量唔講野，唔除衫，隱藏自己嘅性別。佢都真係計劃得幾周詳。係討厭同性戀者，所以要咁做嗎？如果係討厭，咁就唔好假扮做女同性戀者。係要宣示父權嗎？好噁心，唔想知道答案。更噁心嘅係，審訊期間，我收到一封信，嚟自一位聲稱同我有同一遭遇嘅女仔，事發同我相距僅僅4個月。呢個人，好可能唔係第一次犯案。
喺一個平台度見到佢，佢可以話係入錯女同性戀嘅交友平台，係冇心嘅。但喺三個女同性戀嘅平台都見到佢，只可以話係蓄意嘅。但好可惜，喺種種嘅證據下，陪審都係覺得被告真誠地相信，一位從女同性戀平台認識嘅女同性戀者，稱呼被告為姐姐嘅女同性戀者，會同意與一位陌生男性發生性行為。係同性戀呢個概念太難理解嗎？我聽聞陪審團當中大部份都係男性，我大膽估計佢哋都係異性戀嘅，如果佢哋有嘗試從我嘅角度思考，審判結果其實呼之欲出。你上網識咗個女仔，喺唔同嘅社交平台都話自己係個女仔，出到嚟原來係男人，你都驚啦，更何況，呢個男人而家要夾硬性侵你，仲要性侵你嘅時候先同你表明身份？
結果一出，只有股沉重嘅無力感。我明白法律制度要保障疑犯權益，要毫無合理疑點先告得入，但呢個法律制度，今次只帶嚟不公和憤怒。我作供嘅時候，法官，甚至大律師們，對好多性小眾嘅詞彙都不甚了解，L，G，B ，T 同 Q 每一個字都要解釋，每個解釋都只嚟自我自己固有嘅認知。雖然法官同主控都好有耐性咁聽我講，但如果連佢哋自己對呢啲概念都咁不解嘅話，我建議同類型嘅案件不妨有個專家證人，令陪審對唔同性取向同性別認同都有個概念。
性小眾入面嘅 T 代表著跨性別人士，網上有啲評論就用呢單案去攻擊佢哋，呢件事係我唔想見到嘅。男人扮女人去性侵人，問題在於性侵本身，扮女人係佢嘅手法，與跨性別人士無關。更何況，現時香港並不容許一個人去自行選擇性別。一名「跨女」要進入女廁嘅話，係需要醫生紙，並非隨意「扮女人」去入女廁。雖然我無法代表跨性別人士去發表任何意見，但我相信生理性徵係性行為入面重要嘅一環。喺認識另一半嘅時候，即使一名跨女一直表明自己係女性，發生性行為嘅時候亦唔會刻意隱瞞自己跨性別嘅身份。我報案嘅其中一個原因，係希望幫助到其他被性侵嘅性小眾，並唔希望幫助女同性戀者嘅同時，傷害同為性小眾一分子嘅跨性別人士。
我當日見被告之前，雙方可以做啲咩，唔可以做啲咩，都已經一一講清楚，我絕無同意同有男性性徵嘅被告發生性行為。事發後，我馬上逃走，搵相熟嘅人講，搵社工，同日就去咗報警，見法醫。喺性罪行嘅案件，唯一嘅目擊證人多數就只有受害者自己。事前同事後，我都已經盡力保護自己，同保留最多嘅證據，唔通一定要有CCTV片段，又或者被告要曾經顯露到佢有強姦嘅意圖，先至告得入？
我相信法律係有保障每個人身體自主權嘅原意，令每個人喺生活中都唔需要擔心自己俾唔喜歡嘅人或者物件觸碰，甚至性侵。身體係自己嘅，只有自己可以作出決定。女同性戀者喺一個女同性戀平台尋找一名女性性伴侶，唔應該處處擔驚受怕，擔心俾其他性別嘅人士性侵，即使性侵不幸地發生，法律亦應該作出公正嘅判決，懲罰罪犯，同時警醒社會，避免同類型嘅不幸再次發生。
