當你發現今日係母親節

喺Google搜尋母親節，會搵到好多慶祝母親節嘅建議，但係唔少建議令到admin好疑惑：

🤔 例如有人建議「幫阿媽煮餐飯」，admin會諗，媽咪負責煮飯煮咗好多年啦，一年「幫」佢煮一餐係咪足夠呢？

🤔 例如又有人話「幫佢化一個靚妝」，係咪代表媽咪已經忙到無心機化妝？如果係咁，不如平時同媽咪分擔家務，畀媽咪有時間、有心力去扮靚靚，同朋友出去玩，會唔會更好呢？

🤔 亦有唔少人建議話「送上實用小家電」，感謝科技進步，可以令到家務勞動變得更輕鬆，但除咗科技之外，作為家庭入面嘅一份子，有無諗過其實仲有一個明顯可以減輕媽咪負擔嘅辦法？

但係，受住傳統性別文化嘅影響，雙職媽媽仍然無可避免地負擔起大部份家務。2019年就有機構做過雙職家庭嘅調查，超過8成嘅家務項目入面，男性受訪者都表示認同「男女各半分工」，但結果最後都係由女方主力承擔。其中較為明顯嘅項目有「煮食」同埋「管教子女」，分別只有少於2成同少於4成男伴能夠做到共同承擔。[1]

當然，如果媽媽（或任何人）願意主動承擔家務，令其他家庭成員更舒適，絕對值得敬佩，但未必值得鼓勵，因為每個人心力有限，我哋有無主動關心過媽媽嘅需要呢？如果係因為社會文化、性別定型，令到媽媽不得不承擔家務，就係一樣我哋要改善嘅事。

比起只係一年一度嘅慶祝，不如同時作出全年嘅改變。只要作出少少改變，就可以成就一個不一樣（更好）嘅母親節：

💪🏻 唔好覺得自己「幫」媽咪／女伴做家務，家務係屬於每個家庭成員嘅責任，例如每人收拾返自己用過嘅物件、管理返自己嘅私人空間、商議好每人負責嘅家務等。

💪🏻 你都可以係一個家務能手！無一個性別天生識得做家務，唔好用性別做藉口，工多藝熟。

💪🏻 無論係「男主外、女主內」、「家庭主夫」、定係「共同承擔」都唔係問題，最緊要個分工係平等地一齊協商而嚟，而且要定期檢視，避免其中一啲成員超出負擔。

💪🏻 學習尊重非傳統嘅家庭分工模式，唔好拎「家庭主夫」、「事業女性」嚟做取笑嘅話題。

#母親節 #性別平等 #家務勞動 #家務分工

參考資料：

[1]雙職婦女家庭分工及壓力研究發佈會

https://shorturl.at/nBEO9

---